ອົງການກາແດງລາວ

CROIX ROUGE LAO

ເສີມຂະຫຍາຍການພົວພັນລາວ – ຍີ່ປຸ່ນ

ໃນວັນທີ 19 ມີນາ 2019 ທ່ານ ຄຳຮຸ່ງ ເຮືອງວົງສີ ປະທານອົງການກາແດງລາວ ໄດ້ຕ້ອນຮັບ ທ່ານ ມາໂກໂຕະ ວະກະຫມັດຊຸ ຊ່ຽວຊານດ້ານບຸກຄະລະກອນ ດ້ານການກູ້ໄພແລະອຸປະຕິເຫດຕາມຖະຫນົນ ຈາກປະເທດຍີປຸ່ນ ພ້ອມດ້ວຍຄະນະ ທີ່ໄດ້ເດີນທາງມາເຮັດວຽກຢູ່ ສ ປປ ລາວ ເພື່ອເປັນການເສີມຂະຫຍາຍສາຍຮັດແໜ້ນສາຍພົວພັນ, ການຮ່ວມມືໃຫ້ມີຄວາມແໜ້ນແຟ້ນຍິ່ງໆຂຶ້ນ.
ໃນໂອກາດດຽວກັນນີ້ ທ່ານ ຄຳຮຸ່ງ ເຮືອງວົງສີ ປະທານອົງການກາແດງລາວກໍ່ໄດ້ແຈ້ງໃຫ້ຮູ້ກ່ຽວກັບສະພາບດິນຟ້າອາກາດທີ່ມີການປ່ຽນແປງໃນປີຜ່ານມາ ເຊິ່ງໄດ້ເຮັດໃຫ້ ທົ່ວປະເທດໄດ້ຮັບຜົນກະທົບ ອັນໄດ້ສ້າງຄວາມເສຍຫາຍທາງດ້ານພື້ນຖານເສດຖະກິດໂຄງລ່າງ, ດ້ານສາທາລະນະສຸກ, ການສຶກສາ ແລະ ການດຳລົງຊີວິດຂອງປະຊາຊົນ 2ແສນຄົນ, 107 ເມືອງ ແລະ 924 ບ້ານ ແມ່ນໄດ້ຮັບຜົນກະທົບ ພິເສດແມ່ນໄພພິບັດ ຄູກັນນ້ຳເຂື່ອນເຊປຽນ – ເຊນ້ຳນ້ອຍ ແຕກ ໄດ້ສ້າງຜົນກະທົບໂດຍກົງໃຫ້ແກ່ 13 ບ້ານ ຂອງເມືອງ ສະໜາມໄຊ ແຂວງ ອັດຕະປື ແລະ ມີ 6 ບ້ານທີ່ໄດ້ຮັບຜົນກະທົບໜັກກວ່າໝູ່ ຕໍ່ສະພາບເຫດການທີ່ເກີດຂຶ້ນດັ່ງກ່າວ ທາງອົງການກາແດງລາວ ກໍ່ໄດ້ຈັດຕັ້ງຄະນະສະເພາະກິດຂຶ້ນ ເພື່ອໃຫ້ການຊ່ວຍເຫຼືອປະຊາຊົນ ເປັນຕົ້ນແມ່ນໄດ້ມີການປຸກລະດົມຂົນຂວາຍຈາກສັງຄົມເພື່ອຊ່ວຍເຫຼືອຜູ້ປະສົບໄພ ແລະ ນອກຈາກນັ້ນ ກໍ່ໄດ້ມີການວາງແຜນເພື່ອໃຫ້ການຊ່ວຍເຫຼືອສຸກເສີນ ທາງດ້ານສຸຂະອະນາໄມ ແລະ ຕິດຕັ້ງເຄື່ອງກອງນ້ຳໃຫ້ແກ່ຜູ້ປະສົບໄພ.
ທ່ານ ມາໂກໂຕ ວະກະຫມັດຊູ ໄດ້ສະແດງຄວາມດີອົກ ດີໃຈ ທີໃຫ້ການຕ້ອນຮັບຢ່າງອົບອຸ່ນ ຕໍ່ການມາຢ້ຽມຢາມໃນຄັ້ງນີ້ ແລະ ສະແດງຄວາມເປັນຫ່ວງເປັນໃຍ ແລະ ຄວາມຮູ້ສຶກເສຍໃຈທີ່ເກີດໄພພິບັດອັນຮ້າຍແຮງຕໍ່ປະຊາຊົນລາວທີ່ເກິດຂຶ້ນຢູ່ເມືອງສະໜາມໄຊແຂວງອັດຕະປື , ໃນນາມ ທ່ານຕ່າງໜ້າປະຊາຊົນ ຍີ່ປຸ່ນ ຂໍແບ່ງເບົາຄວາມທຸກໂສກໃຫ້ຫາຍສິ້ນໄປ ແລະ ເຊື່ອແນ່ວ່າ ລັດຖະບານ ແລະ ປະຊາຊົນລາວຈະສາມາດຜ່ານຝ່າສິ່ງດັ່ງກ່າວໄປໄດ້ໄວ້ ,ນອກຈາກນັ້ນ ຍັງປຶກສາຫາລືກັນຫລາຍບັນຫາເປັນຕົ້ນກໍ່ແມ່ນ: ດ້ານການຮ່ວມມືການຊ່ວຍເຫຼືອ , ການຄຸ້ມຄອງລະບົບສາງ, ຟື້ນຟູຜູ້ປະສົບໄພ , ການບໍລິຈາກເລືອດ, ການພັດທະນາຄຸນນະພາບຊີວິດ, ການພັດທະນາອົງການ , ການຊອກຫາແຫຼ່ງທຶນ ແລະ ແລກປ່ຽນຂໍ້ມູນຂ່າວສານ, ໃຫ້ການຊ່ວຍເລືອຫນ່ວຍກູ້ໄພ ແລະ ຍັງຈະສືບຕໍ່ໃຫ້ການຊ່ວຍເຫຼືອປະຊາຊົນທີ່ປະສົບໄພນໍ້າຖ້ວມເມືອງສະໜາມໄຊ.