ອົງການກາແດງລາວ

CROIX ROUGE LAO

# ແຂວງຊຽງຂວາງ ຖືເອົາວຽກງານຄຸ້ມຄອງຄວາມສ່ຽງໄພພິບັດເປັນບັນຫາສຳຄັນ.

# ແຂວງຊຽງຂວາງ ຖືເອົາວຽກງານຄຸ້ມຄອງຄວາມສ່ຽງໄພພິບັດເປັນບັນຫາສຳຄັນ.
ໃນລະຫວ່າງວັນທີ 17 – 20 ສິງຫາ 2021 ອົງການກາແດງແຂວງຊຽງຂວາງໄດ້ຈັດຝຶກອົມຮົມກ່ຽວກັບ ການຄຸ້ມຄອງຄວາມສ່ຽງໄພພິບັດ ແລະ ການປະເມີນຄວາມເສຍຫາຍ ແລະ ຄວາມຕ້ອງການໃຫ້ພະນັກງານກາແດງແຂວງ ພ້ອມດ້ວຍ ພາກສ່ວນທີ່ກ່ຽວຂ້ອງ, ໃນການເຝິກອົບຮົມຄັ້ງນີ້ໂດຍກຽດເຂົ້າຮ່ວມໂດຍທ່ານ ຮສ. ດຣ. ພູທອນ ເມືອງປາກ ປະທານອົງການກາແດງລາວ, ທ່ານ ໄຊສົມພອນ ທະວີວົງ ຮອງຫົວໜ້າອົງການກາແດງແຂວງ ຊຽງຂວາງ ພ້ອມດ້ວຍພະນັກງານວິຊາການພະແນກການອອ້ມຂ້າງທີ່ກ່ຽວຂ້ອງເຂົ້າຮ່ວມ 25 ທ່ານ, ຍິງ 7 ທ່ານ.
ການຝຶກອົບຮົມໃນຄັ້ງນີ້ ກໍ່ເພື່ອແນໃສ່ສ້າງຄວາມເຂັ້ມແຂງ ໃນການຮັບມືກັບໄພພິບັດ ໄດ້ຢ່າງປອດໄພ, ມີປະສິດທິພາບ, ທັນເຫດການ; ນອກຈາກນັ້ນ; ນັກສຳມະນາຍັງໄດ້ຮຽນຮູ້ຄວາມຫມາຍຄວາມສຳຄັນໃນວຽກງານກາແດງ, ການຄຸ້ມຄອງໄພພິບັດ , ຄວາມສ່ຽງທີ່ເກີດຈາກໄພພິບັດ, ການປະເມີນຄວາມສ່ຽງ, ຄວາມຕ້ອງການພາຍຫຼັງເກີດໄພພິບັດ, ຄວາມຮູ້ພື້ນຖານໃນການປ້ອງກັນອັກຄີໄພ, ແລະ ໃຫ້ຖືເອົາວຽກງານໄພພິບັດເປັນບັນຫາຕົ້ນຕໍ ເພື່ອແລກປ່ຽນຂໍ້ມູນຂ່າວສານ ການຮ່ວມມືກັບພາກສ່ວນຕ່າງໆ ເພື່ອໃຫ້ມີການກຳນົດແຜນການ, ມາດຕະການ ເພື່ອສະກັດກັ້ນ ແລະ ຫຼຸດຜ່ອນຄວາມສ່ຽງຈາກໄພພິບັດ, ນອກນັ້ນ, ນັກສຳມະນາກອນຍັງໄດ້ຈຳລອງເຫດການໃນການຝຶກຊ້ອມຮັບມືກັບເຫດການອັກຄີໄພໄຟໄໝ້, ເຫດການສຸກເສີນ, ການວິເຄາະຂໍ້ມູນ ແລະ ການລາຍງານຂໍ້ມູນ.
ໃນຕອນທ້າຍ, ທ່ານ ຮສ ດຣ ພູທອນ ເມືອງປາກ ປະທານອົງການກາແດງລາວ ກໍ່ໄດ້ໃຫ້ກຽດໂອ້ລົມຕໍ່ນັກສຳມະນາກອນແລະເນັ້ນໃຫ້ເຫັນຄວາມສຳຄັນຂອງວຽກງານໄພພິບັດ, ໃນໄລຍະຜ່ານມາແຂວງ ຊຽງຂວາງ ກໍ່ແມ່ນແຂວງໜຶ່ງທີ່ພົບກັບບັນຫາໄພພິບັດເກີດຂຶ້ນເປັນຕົ້ນແມ່ນ ດິນເຈື່ອນ, ນ້ຳຊຸຖັ່ງ ເລື້ອຍໆ,ເຊິ່ງເປັນສິ່ງທີ່ທ້າທາຍ ແລະ ມີຄວາມສຽ່ງ ຕໍ່ຊິວິດການເປັນຢູ່ຂອງປະຊາຊົນ, ສະນັ້ນ; ພວກເຮົາຈະຕ້ອງໄດ້ແກ້ໄຂຢ່າງຮີບດ່ວນ ເພື່ອກຳນົດເອົາພູມສັນຖານທີ່ເປັນເຂດຄວາມສ່ຽງໄພພິບັດ ເພື່ອບໍ່ໃຫ້ເກີດຜົນກະທົບທີ່ຮ້າຍແຮງ ຕໍ່ຊີວິດ, ສຸຂະພາບ, ຊັບສິນຂອງລັດ ແລະ ຂອງປະຊາຊົນກໍ່ຄືຊາວແຂວງຊຽງຂວາງ, ຈະຕ້ອງໄດ້ຮ່ວມແຮງຮ່ວມໃຈກັນ ໃນການແກ້ໄຂບັນຫາ ເພື່ອສ້າງຄວາມເຂັ້ມແຂງໃນວຽກງານດັ່ງກ່າວນີ້ ໃຫ້ມີປະສິດທິພາບ ພ້ອມດຽວກັນນັ້ນ, ທ່ານຍັງໄດ້ເນັ້ນໃຫ້ນັກສຳມະນາກອນ ຈົ່ງໄດ້ເປັນກະບອກສຽງໃນການປຸກລະດົມຂົນຂວາຍການບໍລິຈາກເລືອດ, ການສ້າງອາສາສະໝັກກາແດງ ພ້ອມທັງ ນຳສະເໜີວຽກງານກາແດງ ໃຫ້ສັງຄົມຮັບຮູ້ ແລະ ເຂົ້າໃຈຂຶ້ນຕື່ມ ເພື່ອໃຫ້ມີຄວາມເຂັ້ມແຂງ ຂຶ້ນເລື້ອຍໆ.