ອົງການກາແດງລາວ

CROIX ROUGE LAO

ແຂວງວຽງຈັນຍ້ອງຍໍບຸກຄົນດີເດັ່ນໃນການປະກອບສ່ວນລະດົມທຶນຮອນໃນວຽກງານສາທາລະນະສຸກ

ໃນວັນທີ 16 ກຸມພາ 2022 ນີ້ ທ່ານ ຮສ ດຣ ພູທອນ ເມືອງປາກ ປະທານອົງການກາແດງແຫ່ງຊາດລາວ ໄດ້ເຂົ້າຮ່ວມພິທີມອບຮັບການຍ້ອງຍໍໃນພິທີເປີດອາຄານປິ່ນປົວຄົນເຈັບໃຫ້ແກ່ໂຮງໝໍແຂວງວຽງຈັນ ໃນພິທີດັ່ງກ່າວ ທ່ານເຈົ້າແຂວງວຽງຈັນໄດ້ມອບໃບຍ້ອງຍໍຂັ້ນແຂວງໃຫ້ແກ່ ທ່ານ ຮສ.ດຣ ບຸນກອງ ສີຫາວົງ ອະດີດລັດຖະມົນຕີ ກະຊວງສາທາລະນະສຸກ, ທ່ານ ຮສ ດຣ ພູທອນ ເມືອງປາກ ປະທານອົງການກາແດງແຫ່ງຊາດລາວ ທີ່ມີຜົນງານດີເດັ່ນໃນການປຸກລະດົມຂົນຂວາຍແຫຼ່ງທຶນ, ບຸກຄົນ ເພື່ອມາສ້າງຕຶກອາຄານປິ່ນປົວໃຫ້ກັບໂຮງໝໍແຂວງວຽງຈັນຫຼັງໃໝ່ ເພື່ອຮອງຮັບຄົນເຈັບໃຫ້ພຽງພໍ ແລະ ສະດວກສະບາຍຂຶ້ນ. ອາຄານດັ່ງກ່າວເຊິ່ງຈະໄດ້ເປີດນຳໃຊ້ຢ່າງເປັນທາງການໃນວັນທີ 17 ກຸມພາ 2022 ເປັນຕົ້ນໄປ.
ໃນວັນດຽວກັນທ່ານປະທານອົງການກາແດງແຫ່ງຊາດລາວ, ພ້ອມດ້ວຍຄະນະຍັງໄດ້ເຂົ້າເຮັດວຽກຮ່ວມກັບອ້າຍນ້ອງພະນັກງານອົງການກາແດງແຂວງວຽງຈັນ ເພື່ອປຶກສາຫາລືບາງວຽກງານໂຄງການທີ່ໄດ້ຮັບການຊ່ວຍເຫຼືອຈາກກາແດງເພື່ອນມິດ ແລະ ອື່ນໆ ໂດຍການຕ້ອນຮັບຂອງ ທ່ານ ດຣ ບຸນເນົາ ພະຈອມພົນ ຫົວໜ້າອົງການກາແດງແຂວງວຽງຈັນ ພ້ອມດ້ວຍຄະນະ ແລະ ອ້າຍນ້ອງພະນັກງານຕະຫຼອດຮອດອາສາສະໝັກ ໂອກາດດັ່ງກ່າວ ທ່ານ ດຣ ບຸນເນົາພະຈອມພົນ ຫົວໜ້າອົງການກາແດງແຂວງວຽງຈັນໄດ້ລາຍງານສະພາບການຈັດຕັ້ງປະຕິບັດວຽກງານຕະຫຼອດໄລຍະຜ່ານມາ ເຊິ່ງຍົກໃຫ້ເຫັນບາງວຽກງານທີ່ພົ້ນເດັ່່ນ ເປັນຕົ້ນວຽກງານເລືອດ, ວຽກງານຊອກຫາແຫຼ່ງທຶນ, ວຽກງານຊ່ວຍເຫຼືອບັນເທົາທຸກ ແລະ ພິເສດແມ່ນແມ່ນການປະກອບສ່ວນເຂົ້າໃນການຮັບມືກັບການແຜ່ລະບາດພະຍາດໂຄວິດ-19 ຮ່ວມກັບຄະນະສະເພາະກິດ ຂັ້ນແຂວງ ແລະ ອື່ນໆ
ຈາກນັ້ນທ່ານ ປະທານອົງການກາແດງແຫ່ງຊາດລາວກໍໄດ້ໂອ້ລົມສະແດງຄວາມຂອບໃຈຕໍ່ການຕ້ອນຮັບ ພ້ອມທັງເນັ້ນໜັກໃຫ້ຄະນະນຳ, ພະນັກງານຫຼັກແຫຼ່ງ ຕະຫຼອດຮອດພະນັກງານວິຊາການ ແລະ ອາສາສະໝັກ ຈົ່ງໄດ້ເອົາໃຈໃສ່ສ້າງຄວາມສາມັກຄີ, ມີຄວາມອຸ່ນອຽນທຸ່ນທ່ຽງ, ຕ້ອງຮຽນຮູ້ເຂົ້າໃຈວຽກງານຂົງເຂດຂອງຕົນໃຫ້ເລິກເຊິ່ງ,ຈັດແບ່ງວຽກງານໃຫ້ເໝາະກັບວຽກຕົວຈິງ, ໂດຍສະເພາະຜູ້ບໍລິຫານຂັ້ນສູນເລືອດຕ້ອງເປັນບຸກຄົນທີ່ມີຄວາມຮູ້,ຄວາມສາມາດທາງດ້ານວິຊາສະເພາະ ເນື່ອງຈາກເປັນວຽກງານທາງດ້ານວິທະຍາສາດ, ການວິເຄາະວິໄຈເລືອດ, ສາມາດບໍລິຫານຈັດການໃນຂົງເຂດວຽກງານເລືອດໄດ້ດີ; ຕ້ອງຝຶກຝົນວິຊາຕົນເອງຮັບຜິດຊອບໃຫ້ມີຄວາມຊຳນານກາຍເປັນມືອາຊີບ,ກາຍເປັນຄົນດີ, ຄົນເກັ່ງ ແລະ ມີຄວາມຮັບຜິດຊອບ; ອາສາສະໝັກຕ້ອງຮູ້ຫຼາຍວຽກ, ສາມາດປຸກລະດົມຂົນຂວາຍສັງຄົມເຂົ້າມາປະກອບສ່ວນ ອັນສຳຄັນ ຕ້ອງເອົາໃຈໃສ່ໃນການປຸກລະດົມຂົນຂວາຍແຫຼ່ງທຶນ ແລະ ອາສາສະໝັກແລະອື່ນໆ.