ອົງການກາແດງລາວ

CROIX ROUGE LAO

ແຂວງ ໄຊສົມບູນຮັບຟັງວຽກງານກາແດງ

ໃນວັນທີ 4 ກັນຍາ 2019 ອົງການກາແດງລາວ ໄດ້ຈັດ ພິທີປະຖະກະຖາ ກ່ຽວກັບວຽກງານ ອົງການກາແດງລາວຂຶ້ນທີ່ ຫ້ອງປະຊຸມ ແຂວງ ໄຊສົມບູນ. ພາຍໃຕ້ການເປັນປະທານຂອງທ່ານ ພອຍຄຳ ຮຸ່ງບຸນຍວງ ຮອງເຈົ້າແຂວງ ແຂວງ ໄຊສົມບູນ, ທ່ານ ທອງພະຈັນ ສອນນະສິນ ຮອງປະທານອົງການກາແດງລາວ, ມີບັນດາ ຫົວໜ້າພະແນກການຕ່າງໆພາຍໃນແຂວງ, ພະນັກງານວິຊາການ ແລະ ພະນັກງານກາແດງ ເຂົ້າຮ່ວມຈຳນວນ 160 ທ່ານ, ຍິງ 55 ໃນພິທີ ທ່ານ ພອນຄຳ ແກ້ວວິໄລ ໄດ້ຫວນຄືນປະຫວັດອົງການກາແດງລາວໃນບາງຕອນກ່າວວ່າ: ອົງການກາແດງລາວ ຖືກສ້າງຕັ້ງຂຶ້ນໃນວັນທີ 1 ມັງກອນ ປີ 1955 ໄດ້ຖືກຮັບຮອງຈາກຄະນະກຳມະການກາແດງສາກົນ ໃນວັນທີ 23 ພຶດສະພາ 1957 ແລະ ໄດ້ເຂົ້າເປັນສະມາຊິກຂອງສະຫະພັນກາແດງ ແລະ ຊີກວົງເດືອນແດງສາກົນໃນວັນທີ 25 ຕຸລາ 1957 ທີ່ກອງປະຊຸມຄັ້ງທີ 24 ທີ່ນິວເດັນລີ ປະເທດອິນເດຍ ເຊິ່ງລາວເຮົາໄດ້ເຂົ້າເປັນພາຄີສົນທິສັນຍາສາກົນ ໃນປີ 1956 ໂດຍມີ 4 ສະບັບເຊັ່ນ: 1. ການເບິ່ງແຍງທະຫານທາງບົກທີ່ໄດ້ຮັບບາດເຈັບ, 2. ການເບິ່ງແຍງ ແລະ ອື່ນໆ. ຕາມ 7 ຫຼັກການພື້ນຖານຂອງຂະບວນການກາແດງສາກົນ, ເຊິ່ງປະກອບມີ 5 ພາກສ່ວນໃຫ່ຍຄື: ມີຫ້ອງການ, ກອງໂຄສະນາ ແລະ ຂົນຂວາຍການກຸສົນ, ກອງຊ່ວຍເຫຼືອບັນເທົາທຸກ, ກອງສົ່ງເສີມສຸຂະພາບຊຸມຊົນ ແລະ ສູນເລືອດແຫ່ງຊາດ, ອົງການກາແດງລາວລວມມີ 9 ໜ້າວຽກຫຼັກຄືດັ່ງນີ້: ການຊ່ວຍເຫຼືອບັນເທົາທຸກເບື້ອງຕົ້ນ, ການບໍລິຈາກເລືອດ – ສະໜອງເລືອດປອດໄພ, ການສົ່ງເສີມສຸຂະພາບຂັ້ນພື້ນຖານ, ການປະຖົມພະຍາບານ, ການກູ້ໄພສຸກເສີນ, ການໂຄສະນາ ແລະ ຂົນຂວາຍແຫຼ່ງທຶນ, ການສ້າງອາສາສະໝັກກາແດງ, ການສືບທາວຫາຍາດພີ່ນ້ອງ,ການພົວພັນ ແລະ ຮ່ວມມືສາກົນ, ນອກຈາກນັ້ນ ທ່ານ ທອງພະຈັນ ສອນນະສິນ ຮອງປະທານອົງການກາແດງລາວ ໄດ້ຊີ້ໃຫ້ເຫັນຄວາມສະດວກ, ສິ່ງທ້າທາຍ ແລະ ຄວາມຫຍຸ້ງຍາກໃນການປະຕິບັດໜ້າທີ່ວຽກງານຂອງອົງການກາແດງລາວຜ່ານມາ ໂດຍສະເພາະວຽກງານບໍລິຈາກເລືອດ ເປັນສິ່ງຈຳເປັນ ແລະ ທ້າທາຍໂດຍສະເພາະງົບປະມານຕ່າງໆ ທຸກພາກສ່ວນໃນສັງຄົມຄວນມີສ່ວນຮ່ວມ, ທ່ານຍັງໄດ້ຍົກໃຫ້ເຫັນເຖິງ ກົດໝາຍວ່າດ້ວຍວຽກງານອົງການກາແດງລາວ ເພື່ອເຮັດໃຫ້ວຽກງານດັ່ງກ່າວ ມີຄວາມໜັກແໜ້ນ, ເຂັ້ມແຂງ, ມີປະສິດທິພາບ ເພື່ອແນໃສ່ໃຫ້ການຊ່ວຍເຫຼືອປະຊາຊົນ ໄດ້ຢ່າງທັນການ, ທົ່ວເຖິງ ສາມາດເຊື່ອມໂຍງກັບພາກພື້ນ ແລະ ສາກົນ.
ໃນຕອນທ້າຍ ທ່ານ ພອຍຄຳ ຮຸ່ງບຸນຍວງ ຮອງເຈົ້າແຂວງ ແຂວງໄຊສົມບູນ ກໍ່ໄດ້ປະກອບຄຳເຫັນໃສ່ ຍົກໃຫ້ເຫັນຂໍ້ສະດວກ ແລະ ຂໍ້ຫຍຸ້ງຍາກ ເປັນຕົ້ນໃນດ້ານງົບປະມານໃນການໃຊ້ຈ່າຍໃນວຽກງານຂອງອົງການກາແດງລາວ ເພື່ອລົງຄື່ອນໄຫວໃນວຽກງານຕ່າງໆເປັນຕົ້ນແມ່ນວຽກງານການບໍລິຈາກເລືອດ, ການຊ່ວຍເຫຼືອປະຊາຊົນຜູ້ທຸກຍາກ ແລະ ທ່ານຍັງໄດ້ປຸກລະດົມພະນັກງານໃຫ້ມີຄວາມເອົາໃຈໃສ່ໃນວຽກງານມະນຸດສະທຳໃຫ້ຫຼາຍຂຶ້ນກວ່າເກົ່າ ເພາະວຽກງານມະນຸດສະທຳແມ່ນໜ້າທີ່ຂອງໝົດທຸກຄົນ.