ອົງການກາແດງລາວ

CROIX ROUGE LAO

ແຈ້ງຂ່າວເສົ້າສະຫລົດໃຈ ຕໍ່ການຈາກໄປຂອງ ທ່ານ ຄຳຮຸ່ງ ເຮືອງວົງສີ ອະດີດກຳມະການສູນກາງພັກ ສະໄໝທີ IX

ເລຂາພັກແຂວງ-ອະດີດເຈົ້າແຂວງຫົວພັນ, ອະດີດຮອງລັດຖະມົນຕີກະຊວງສາທາລະນະສຸກ ອະດີດປະທານອົງການກາແດງແຫ່ງຊາດລາວ.
ຄະນະບໍລິຫານສູນກາງພັກ, ລັດຖະບານແຫ່ງ ສປປ ລາວ, ຫ້ອງວ່າການສູນກາງພັກ, ສູນກາງແນວລາວສ້າງຊາດ, ປົກຄອງແຂວງຫົວພັນ, ກະຊວງແຮງງານ ແລະ ສະຫວັດດີການສັງຄົມ, ກະຊວງສາທາລະນະສຸກ, ອົງການກາແດງແຫ່ງຊາດລາວ ແລະ ຄອບຄົວ ເຮືອງວົງສີ ຂໍແຈ້ງຂ່າວຄວາມເສົ້າສະລົດໃຈ ມາຍັງສະມາຊິກ, ພະນັກງານ, ນັກຮົບ ແລະ ພີ່ນ້ອງຮ່ວມຊາດຊາບທົ່ວເຖິງກັນວ່າ: ສະຫາຍ ຄຳຮຸ່ງ ເຮືອງວົງສີ ອາດີດກຳມະການສູນກາງພັກສະໄໝທີ IX, ອາດີດເລຂາພັກແຂວງ-ອາດີດເຈົ້າແຂວງແຂວງຫົວພັນ, ອາດີດຮອງລັດຖະມົນຕີກະຊວງສາທາລະນະສຸກ ແລະ ອາດີດປະທານອົງການກາແດງແຫ່ງຊາດລາວ ໄດ້ເສຍຊີວິດໃນເວລາ 12:30 ໂມງ ຂອງວັນທີ 27/04/2022 ດ້ວຍພະຍາດຜູ້ກ່ຽວເອງ ລວມອາຍຸໄດ້ 70 ປີ.
ເພື່ອຈາລຶກຄຸນງາມຄວາມດີຂອງ ສະຫາຍ ຄຳຮຸ່ງ ເຮືອງວົງສີ ທີ່ໄດ້ອຸທິດແກ່ປະເທດຊາດ ແລະ ການປະຕິວັດ, ດ້ວຍຄວາມອາໄລອາວອນຢ່າງສຸດຊຶ້ງຕໍ່ສະຫາຍ ເຊິ່ງເປັນໜຶ່ງໃນບັນດາພະນັກງານການນຳຂັ້ນສູງຂອງພັກລັດ.
ຄະນະບໍລິຫານງານສູນກາງພັກ, ລັດຖະບານແຫ່ງ ສປປ ລາວ, ສູນກາງແນວລາວສ້າງຊາດ, ປົກຄອງແຂວງຫົວພັນ, ກະຊວງແຮງງານ ແລະ ສະຫວັດດີການສັງຄົມ, ກະຊວງສາທາລະນະສຸກ, ອົງການກາແດງແຫ່ງຊາດລາວ ໄດ້ຕົກລົງໄວ້ອາໄລຢ່າງເປັນທາງການເປັນເວລາ 04 ວັນ ນັບແຕ່ວັນທີ 27-30 ເມສາ 2022, ປະຈຸບັນສົບຂອງເພິ່ນແມ່ນໄດ້ບຳເພັນກຸສົນຢູ່ເຮືອນຂອງເພິ່ນເອງທີ່ ບ້ານ ສີດຳດວນ ຮ່ອມ 06, ເມືອງ ຈັນທະບູລີ, ນະຄອນຫລວງວຽງຈັນ, ສ່ວນວັນຊາປະນະກິດສົບຈະໄດ້ຈັດຂຶ້ນຢ່າງເປັນທາງການໃນວັນທີ 30/04/2022(ກົງກັບວັນເສົາ) ເວລາ 13:30 ນາທີ,ທີ່ວັດເທບນິມິດ(ວັດທາດຝຸ່ນ).
ດັ່ງນັ້ນ, ຈຶ່ງແຈ້ງຂ່າວມາຍັງສະມາຊິກພັກ, ພະນັກງານ, ນັກຮົບ ແລະ ປະຊາຊົນລາວບັນດາເຜົ່າໃນທົ່ວປະເທດ ເພື່ອຊາບທົ່ວເຖິງກັນ.
ນະຄອນຫຼວງວຽງຈັນ, ວັນທີ 27 ເມສາ 2022.