ອົງການກາແດງລາວ

CROIX ROUGE LAO

ໄຊຍະບູລີ ໄດ້ຮັບຜົນກະທົບຈາກນ້ຳຖ້ວມ ສ້າງຄວາມເສຍຫາຍ 90 ກວ່າຕື້ກີບ.

ນັບແຕ່ວັນທີ 11-14 ມິຖຸນາ 2021 ໄດ້ເກີດມີຝົນຕົກໜັກເນື່ອງຈາກຜົນກະທົບຂອງພາຍຸດິເປຣຊັນ (ພາຍຸໂຄກຸມະ) ແລະ ລົມມໍລະສຸມຕາເວັນຕົກສ່ຽງໃຕ້ ໄດ້ພັດປົກຄຸມແຂວງໄຊຍະບູລີ ດ້ວຍກໍາລັງແຮງເຮັດໃຫ້ເກີດນໍ້າໄຫຼຊຸ, ດິນຖະຫຼົ່ມ, ນໍ້າຖ້ວມເຮືອນປະຊາຊົນ, ຖ້ວມເນື້ອທີ່ການຜະລິດ, ເສັ້ນທາງຈໍານວນໜຶ່ງຂາດ, ເສົາໄຟຟ້າຫັກ ຊຶ່ງມີ 7 ເມືອງທີ່ໄດ້ຮັບຜົນກະທົບຄື: ເມືອງໄຊຍະບູລີ, ເມືອງພຽງ, ເມືອງຄອບ, ເມືອງຊຽງຮ່ອນ, ເມືອງເງິນ, ເມືອງຫົງສາ ແລະ ເມືອງໄຊສະຖານ. ໃນນັ້ນ, ເມືອງໄຊຍະບູລີ ໄດ້ຮັບຜົນກະທົບຫຼາຍກວ່າໝູ່ ເຮັດໃຫ້ມີຊັບສິນຂອງລັດ ຂອງລວມໝູ່ ແລະ ຂອງປະຊາຊົນເສຍຫາຍເປັນຈຳນວນຫຼວງຫຼາຍ.
ທ່ານ ເພັດພິໄຊ ສູນວິໄວ ຮອງເຈົ້າແຂວງ ປະທານຄະນະກໍາມະການຄຸ້ມຄອງໄພພິບັດຂັ້ນແຂວງ ໄດ້ລາຍງານສະພາບຄວາມເສຍຫາຍຂອງໄພນໍ້າຖ້ວມ ວ່າ: ຈາກການເກັບກຳຂໍ້ມູນເບື້ອງຕົ້ນຜົນເສຍຫາຍລວມມີ 56 ບ້ານ ມີ 5.248 ຄອບຄົວ ຈໍານວນພົນ 20.992 ຄົນ ຍິງ 8.920 ຄົນ (ສະເພາະເມືອງໄຊຍະບູລີ ໄດ້ຮັບຜົນກະທົບ 39 ບ້ານ), ລວມມູນຄ່າເສຍຫາຍທັງໝົດໃນທົ່ວແຂວງ 94 ຕື້ກີບ, ມີເຮືອນປະຊາຊົນເປ່ເພເສຍຫາຍ 4.221 ຫຼັງຄາເຮືອນ, ໃນນັ້ນ, ເຮືອນ 19 ຫຼັງໄດ້ຖືກນໍ້າພັດໄຫຼໜີ, ໄຟຟ້າຖືກຕັດຂາດ 16 ບ້ານ (ສາມາດແກ້ໄຂໄດ້ແລ້ວ 7 ບ້ານ, ຍັງ 9 ບ້ານແກ້ໄຂບໍ່ທັນສໍາເລັດ), ໝໍ້ນັບໄຟຖືກນໍ້າຖ້ວມເສຍຫາຍ 6.050 ໜ່ວຍ (ໃນນີ້ບໍ່ສາມາດໃຊ້ໄດ້ 3.500 ໜ່ວຍ), ເສົາໄຟຟ້າລົ້ມ 7 ຕົ້ນ ແລະ ຕາຂ່າຍໄຟຟ້າຖືກຕັດຂາດ 3 ຈຸດ, ສ້ອມແປງຄືນໄດ້ແລ້ວ 1 ຈຸດ, ຍັງ 2 ຈຸດ, ຈັກສູບນໍ້າປະປາຖືກນໍ້າຖ້ວມ ເປ່ເພ ເຮັດໃຫ້ທົ່ວເມືອງໄຊຍະບູລີ ບໍ່ສາມາດນໍາໃຊ້ນໍ້າປະປາໄດ້, ເສັ້ນທາງຖືກຕັດຂາດເສຍຫາຍທັງໝົດ 25 ເສັ້ນ, ຂົວເບຕົງ 5 ແຫ່ງ, ທໍ່ດາໂລ 3 ແຫ່ງ, ຂົວອູ່ເປ່ເພ 1 ແຫ່ງ, ພາຫະນະລົດໃຫຍ່ຈົມນໍ້າເປ່ເພ 472 ຄັນ, ລົດຈັກ ຈົມນໍ້າເປ່ເພ 4.840 ຄັນ, ເຂົ້າສານຖືກນໍ້າຖ້ວມເສຍຫາຍ 300 ໂຕນ, ໜອງປາ 240 ໜອງ, ໂຮງ​ຮຽນ​ເສຍ​ຫາຍ 11 ຫຼັງ, ນ້ຳ​ລິນ 3 ແຫ່ງ, ນ້ຳ​ສ້າງ 1.088 ແຫ່ງ, ນ້ຳ​ລິນ 3 ແຫ່ງ, ຫ້ອງ​ນ້ຳ-ວິດ​ຖ່າຍ 3.105 ແຫ່ງ, ສັດ​ລ້ຽງ​ປະ​ເພດ​ ງົວ, ຄວາຍ, ໝູ, ສັດ​ປີກ ລົ້ມ​ຕາຍ ແລະ ຖືກ​ນ້ຳ​ພັດ​ໄຫຼຢ່າງຫຼວງຫຼາຍ, ສະເພາະນໍ້າຖ້ວມຄັ້ງນີ້ ແມ່ນບໍ່ມີຄົນເສຍຊີວິດ.