ອົງການກາແດງລາວ

CROIX ROUGE LAO

ພາກ​ສ່ວນ​ສັງ​ຄົມ​ປະ​ກອບ​ສ່ວນ​ຊ່ວຍ​ເຫຼືອ​ໃນ​ວຽກ​ງານ​ຕ້ານ​ພະ​ຍາດ​ໂຄວິດ-19 ໃຫ້​ແກ່​ອົງ​ການ​ກາ​ແດງ​ລາວ.

ໃນວັນທີ 12 ຕຸ​ລາ 2021 ທີ່ອົງ​ການ​ກາ​ແດງ​ລາວ ໄດ້ມີພິທີມອບຮັບ​ເງິນ ແລະ ເຄື່ອງຊ່ວຍເຫລືອ​ໃນ​ວຽກ​ງານ​ຕ້ານ​ພະ​ຍາດ​ໂຄວິດ-19 ຈາກ 5 ພາກ​ສ່ວນ,ໄດ້​ແກ່​ຄອບ​ຄົວ​ຂອງທ່ານ ກ້ອງຟ້າ ​ແລະ ທ່ານ ນ. ອາມອນ ພູມມະສັກ ພ້ອມ​ດ້ວຍ​ລູກຫຼານ ແລະ ພະ​ນັກ​ງານ​ຮ້ານ​ຟ້າ​ວັດ​ທະ​ນາ ມອບ​ເງິນ​ສົດຈຳ​ນວນ 16.000.000 ກີບ; ທ່ານ ອິນ​ປົງ ຫານ​ຊົມ​ພູ ຄົນ​ເຊື້ອ​ຊາດ​ລາວ ທີ່​ປະ​ເທດ​ອົດ​ສະ​ຕ​ຣາ​ລີ ​ມອບ​ເງິນ​ສົດຈຳ​ນວນ 600 ໂດ​ຣາ, ຮ້ານ​ອາ​ຫານ​ສະ​ຕະ​ວັດ​ທີ 21 ​ມອບ​ເງິນ​ສົດຈຳ​ນວນ 5.000.000 ກີບ, ບໍ​ລິ​ສັດ ດາວ​ເຮືອງ ແລະ ຮ້ານ​ອາ​ຫານ ຟູ​ຈິ​ວາ​ລະ ມອບ​ນ້ຳ​ດື່ມ 100 ແກັດ ແລະ ກາ​ເຟ ມູນ​ຄ່າ 7.000.000 ກີບ, ຄອບ​ຄົວມາ​ລີ​ນີ ອິນ​ທະ​ວົງ ມອບ​ເງິນ​ສົດ​ຈຳ​ນວນ 5.000.000 ກີບ, ລວມ​ມູນ​ຄ່າ​ການ​ຊ່ວຍ​ເຫຼືອ​ໃນ​ຄັ້ງ​ນີ້: 33.000.000 ກີບ, 600 ໂດ​ຮາ; ກ່າວຮັບໂດຍ ທ່ານ ຮ​ສ.ດ​ຣ. ພູ​ທອນ ເມືອງ​ປາກ ປະ​ທານ​ອົງ​ການ​ກາ​ແດງ​ລາວ; ມີພະນັກງານທີ່ກ່ຽວຂ້ອງ ເຂົ້າຮ່ວມເປັນສັກຂີພະຍານ.

 

ທ່ານ ຮ​ສ.ດ​ຣ. ພູ​ທອນ ເມືອງ​ປາກ ປະ​ທານ​ອົງ​ການ​ກາ​ແດງ​ລາວ ໄດ້ກ່າວສະແດງຄວາມຂອບໃຈຕໍ່​ທາງ 5 ພາກ​ສ່ວນທີ່ໄດ້ປະ​ກອບ​ສ່ວນ​ວັດ​ຖຸ​ປັດ​ໃຈຊ່ວຍເຫລືອ​ໃນ​ວຽກ​ງານ​ຕ້ານ​ພະ​ຍາດ​ໂຄວິດ-19 , ​ທ່ານ​ຍັງ​ໄດ້​ໃຫ້​ຮູ້​ຕື່ມ​ອີກວ່າໃນ​ໄລ​ຍະ​ຜ່ານ​ມາ​ອົງ​ການ​ກາ​ແດງ​ລາວໄດ້ແຕ່ງຕັ້ງຄະນະສະເພາະກິດ ຂອງອົງການກາແດງລາວ ລວມ​ທັງພະນັກງານ ແລະ ອາສາສະໝັກກາແດງ ປະສານງານ ແລະ ເຮັດວຽກຮ່ວມກັບຄະນະສະເພາະກິດແຕ່ລະແຂວງ; ປະກອບສ່ວນໃນວຽກງານ ໂຄສະນາເຜີຍແຜ່ມາດຕະການປ້ອງກັນການຕິດເຊື້ອ, ແຜ່ເຊື້ອ ຢູ່ໃນຊຸມຊົນ ແລະ ສູນຈຳກັດບໍລິເວນ, ນຳພາເຮັດກິດຈະກຳອອກກຳລັງກາຍ ອະນາໄມ, ບຳບັດສຸຂະພາບຈິດ ໃຫ້​ແກ່ຜູ້ຈຳກັດບໍລິເວນຢູ່ສູນຈຳກັດບໍລິເວນ, ພົ່ນຢາຂ້າເຊື້ອຢູ່ໃນຊຸມຊົນ – ສູນຈຳກັດບໍລິເວນ, ແຈກຢາຍອາຫານຢູ່ສູນຈຳກັດບໍລິເວນ ແລະ ໂຮງໝໍພາກສະໜາມບາງແຫ່ງ ທີ່ມີການຊ່ວຍເຫຼືອຈາກກາແດງ, ຈັດຕັ້ງໃຫ້ມີລົດກູ້ໄພປະຈຳຢູ່ສູນຈຳກັດບໍລິເວນເພື່ອແກ້ໄຂສຸກເສີນ ແລະ ສົ່ງຄົນເຈັບທີ່ຢູ່ສູນ ຈໍາກັດບໍລິເວນໄປໂຮງໝໍ. ສຳ​ລັບເງິນ​ຈຳ​ນວນ​ດັ່ງ​ກ່​າວນີ້ ທາງ​ອົງ​ການ​ກາ​ແດງ​ລາວ ແມ່ນ​ຈະ​ໄດ້​ນຳ​ໄປ​ປະ​ກອບ​ສ່ວນ ສະ​ໜອງ​ອາ​ຫານ, ນ້ຳ​ດື່ມ ແລະ ເຄື່ອງ​ສຸ​ຂະ​ອະ​ນາ​ໄມ ໃຫ້​ແກ່​ຜູ້​ຈຳ​ກັດ​ບໍ​ລິ​ເວນ​ຢູ່​ພາຍ​ໃນ​ສູນ​ຈຳ​ກັດ​ບໍ​ລິ​ເວນ ແລະ ຜູ້​ທີ່​ຕິດ​ເຊື້ອ​​ພະ​ຍາດໂຄວິດ-19 ທີ່​ພວ​ມ​ປິ່ນ​ປົວ​ຢູ່​ໂຮງ​ໝໍ​​ພາກສະ​ໜາມ, ການ​ປະ​ກອບ​ສ່ວນ​ໃນ​ຄັ້ງ​ນີ້​ແມ່ນ​ສອດ​ຄ່ອງ​ກັບ​ຄວາມ​ຮຽກ​ຮ້ອງ​ຕ້ອງ​ການ​ຕົວ​ຈິງ​ຂອງ​ສະ​ພາບ​ການ​ໃນ​ປັດ​ຈ​ຸ​ບັນ ເຊິ່ງ​ໄດ້​ສະ​ແດງ​ເຖິງ​ຄວາມ​ມີ​ສະ​ຕິ​ຕື່ນ​ຕົວ​ທາງ​ດ້ານ​ກາ​ນ​ເມືອງ, ຄວາມ​ເສຍ​ສະຫຼະ, ຄວາມ​ເອື້ອ​ເຟື້ອ​ເພື່ອ​ແຜ່, ຄວາມ​ເປັນ​ຫ່ວງ​ເປັນ​ໃຍ, ຄວາມ​ເປັນ​ແບບ​ຢ່າງ​ທີ່​ດີ ແລະ ກາຍ​ເປັນ​ກຳ​ລັງ​ແຮງອັນ​ໃຫຍ່ຫຼວງ​ໃຫ້​ແກ່​ປະ​ເທດ​ຊາດ ແລະ ປະ​ຊາ​ຊົນ ໂດຍ​ສະ​ເພາະ​ພະນັກ​ງານ ແພດ​ໝໍ, ອາ​ສາ​ສະ​ໝັກ ແລະ ເຈົ້າ​ໜ້າ​ທີ່​ທຸກ​ຄົນ​ທີ່​ພວມ​ປະ​ຕິ​ບັດ​ໜ້າ​ທີ່​ຕ້ານ​ການ​ແຜ່​ລະ​ບາດ​ຂອງ​ເຊື້ອ​ພະ​ຍາດ​ໂຄວິດ-19 ຢູ່​ໃນ​ທົ່ວ​ປະ​ເທດ, ພ້ອມ​ທັງ​ໃຫ້​ຄຳ​ໝັ້ນ​ສັນ​ຍາ​ວ່າ ຈະ​ນຳ​ເງິນ​ຊ່ວຍ​ເຫຼືອ​ດັ່ງ​ກ່າວ ໃຫ້​ຖືກ​ກັບ​ຈ​ຸດ​ປະ​ສົງ ແລະ ເປົ້າ​ໝາຍ​ໃຫ້​ເກີດ​ປະ​ໂຫຍດ​ທີ່​ສູງ​ສຸດ.