ອົງການກາແດງລາວ

CROIX ROUGE LAO

70 ປີສົນທິສັນຍາເຊີແນວ.

 

ໃນຕອນເຊົ້າວັນທີ 25 ກໍລະກົດ 2019 ທີ່ໂຮງແຮມ ຄຮາວພາຊ້າ ນະຄອນຫລວງວຽງຈັນ ສະຖານທູດສະວິດປະຈຳລາວ ຮ່ວມກັບ ຄະນະກຳມະການກາແດງສາກົນ (ICRC) ໄດ້ຈັດງານສະເຫຼີມສະຫຼອງ ສົນທິສັນຍາເຊີແນວ (12/08/1949 – 12/08/2019), ມີຜູ້ຕາງໜ້າ ຈາກບັນດາກະຊວງ, ຜູ້ຈາກໜ້າຈາກສະຖານທູດປະຈຳ ສ ປປ ລາວ, ອົງການຈັດຕັ້ງ ສາກົນ, ອົງການກາແດງລາວ ແລະ ເຈົ້າໜ້າທີ່ທີ່ກ່ຽວຂ້ອງເຂົ້າຮ່ວມ.


ທ່ານ ຄຳຮຸ່ງ ເຮືອງວົງສີ ປະທານອົງການກາແດງລາວ ໄດ້ກ່າວວ່າ: ປະເທດລາວໄດ້ເຂົ້າຮ່ວມເປັນພາຄີໃນສົນທິສັນຍາເຊີແນວ 4 ສະບັບ ໃນປີ 1956 (ເອີ້ນວ່າສົນທິສັນຍາເຊີແນວ 12 ສິງຫາ 1949) ເປັນຕົ້ນສົນທິສັນຍາສາກົນວ່າດ້ວຍໃຫ້ການຊ່ວຍເຫຼືອທະຫານທີ່ຖືກບາດເຈັບຈາກສົງຄາມ ແລະ ປ່ວຍທາງພາກພື້ນດິນ, ສົນທິສັນຍາວ່າດ້ວຍການໃຫ້ການຊ່ວຍເຫຼືອທະຫານທີ່ຖືກບາດເຈັບ ແລະ ເຈັບປ່ວຍໃນນ່ານນ້ຳ, ສົນທິສັນຍາວ່າດ້ວຍການໃຫ້ການຄຸ້ມຄອງ ແລະ ດູແລຊະເລີຍເສິກສົງຄາມ ແລະ ສົນທິສັນຍາວ່າດ້ວຍການຊ່ວຍເຫຼືອພົນລະເຮືອນທາງດ້ານຊີວິດ ແລະ ຊັບສິນ ໃນເວລາເກີດສົງຄາມ, ລາວເຮົາໄດ້ຈັດຕັ້ງປະຕິບັດສົນທິສັນຍາດັ່ງກ່າວເປັນຢ່າງດີເຊັ່ນ: ໃນປາງສົງຄາມເພື່ອຫຼີກລ້ຽງການປະທະກັນ,ການຂ້າຟັນ ມັນຈຶ່ງຜັກດັນໃຫ້ມີການລວມລາວ ຄັ້ງທີ I,II,III ຈຶ່ງສາມາດປົດປ່ອຍທົ່ວປະເທດ ແລະ ການໄວ້ຊີວິດສະເລີຍເສິກສົງຄາມ, ສຳມະນາ ສຶກສາອົບຮົມ ໃຫ້ເຂົາເຈົ້າເຂົ້າໃຈ ແລະ ກາຍເປັນຄົນດີຮັບໃຊ້ສັງຄົມ, ນອກຈາກນັ້ນ ຍັງໄດ້ຮັບເຄື່ອງຊ່ວຍເຫຼືອ, ສະບຽງອາຫານ, ຢາປົວພະຍາດ, ອຸປະກອນການແພດຈຳນວນໜຶ່ງ, ສ່ວນອົງການກາແດງລາວແມ່ນໄດ້ຮັບທຶນເຄື່ອນໄຫວກິດຈະກຳບໍລິຈາກເລືອດ, ຝຶກອົບຮົມບຸກຄະລາກອນ, ສ້າງຂີດຄວາມສາມາດ, ສ້າງພື້ນຖານໂຄງລ່າງ ແລະ ໄດ້ຮັບການສະໜັບສະໜູນ ເວລາເກີດໄພພິບັດສຸກເສີນ ໂດຍສະເພາະໄພພິບັດເຂື່ອນແຕກ ທີ່ເມືອງ ສະໜາມໄຊ ແຂວງ ອັດຕະປື. 


ທ່ານ ຈີອານນີ ໂວປິນ ຫົວໜ້າຫ້ອງການຄະນະກຳມະການກາແດງສາກົນປະຈຳ ສ ປປ ລາວ ໄດ້ກ່າວວ່າ: ສົນທິສັນາເຊີແນວ 1949 ເປັນໜຶ່ງໃນສົນທິສັນຍາສາກົນທີ່ທົວ່ວໂລກໄດ້ເຂົ້າຮ່ວມເປັນພາຄີ ແລະ ສືບຕໍ່ມີບົດບາດສຳຄັນ ເຖິງວ່າປັດຈຸບັນຈະມີການນຳໃຊ້ເຕັກໂນໂລຊີໃໝ່ໆ, ວິທີການໃໝ່ໆ ເປັນຕົ້ນທາງດ້ານຄອມພິວເຕີ ແລະ ຢູ່ອາວະກາດເຂົ້າມານຳໃຊ້ໃນການສູ້ຮົບກໍ່ຕາມ ກົດລະບຽບຕ່າງໆກໍ່ຍັງມີຄວາມສັກສິດຄືເກົ່າ ບໍ່ວ່າຈະຢູ່ໃນສະຖານະການໃດກໍ່ຕາມ ລັດພາຄີຍັງມີຂໍ້ຜູກມັດ ຈາກກົດລະບຽບທີ່ໄດ້ລະບຸໄວ້ໃນສົນທິສັນຍາເຊີແນວ 1949 ບໍ່ວ່າຄວາມຂັດແຍ້ງທາງດ້ານກຳລັງປະກອບອາວຸດກໍຕາມ ການຜັນຂະຫຍາຍ ແລະ ນຳໃຊ້ສົນທິສັນຍາເຊີແນວ ຍັງມີຄວາມທ້າທາຍ ແຕ່ສົນທິສັນຍາດັ່ງກ່າວ ຍັງສືບຕໍ່ເປັນໜຶ່ງໃນກົດໝາຍ ແລະ ຄູ່ມືສຳຄັນໃນການພັດທະນາກົດໝາຍມະນຸດສະທຳສາກົນໃນອະນະຄົດ.