14/09/2023
ອົງການກາແດງແຫ່ງຊາດລາວ ສ້າງຕັ້ງຂຶ້ນໃນປີ 1955 ແມ່ນ ອົງການ ການຈັດຕັ້ງທາງສັງຄົມ ມີໜ້າທີ່ຊ່ວຍລັດຖະບານໃນວຽກງານມະນຸດສະທຳ ໂດຍສະເພາະການຊ່ວຍເຫຼືອປະຊາຊົນຜູ້ດ້ອຍໂອກາດ ແລະ ຜູ້ປະສົບໄພ ໃຫ້ທັນ ເວລາ ຕາມຄວາມຕ້ອງການຂັ້ນພື້ນຖານ ເພື່ອແກ້ໄຂບັນເທົາທຸກຊີວິດການເປັນຢູ່, ສຸຂະພາບ ໃຫ້ມີຄວາມປອດໄພ ແລະ ມີກຽດສັກສີຂອງມະນຸດ.
ອົງການກາແດງແຫ່ງຊາດລາວເຄື່ອນໄຫວຢ່າງເປັນເອກະລາດທີ່ມີການເຂົ້າຮ່ວມຂອງສັງຄົມ ຢູ່ພາຍໃຕ້ ລັດຖະທຳມະນູນ, ກົດໝາຍ ແລະ ເຈັດຫຼັກການພື້ນຖານຂອງຂະບວນການກາແດງ ແລະ ຊີກວົງເດືອນແດງສາກົນ; ໃຫ້ການ: ຊ່ວຍເຫຼືອບັນເທົາທຸກເບື້ອງຕົ້ນ; ປຸກລະດົມຂົນຂວາຍບໍລິຈາກເລືອດ ແລະ ການສະໜອງເລືອດທີ່ປອດໄພ; ສົ່ງເສີມສຸຂະພາບຂັ້ນພື້ນຖານ; ປະຖົມພະຍາບານ; ກູ້ໄພສຸກເສີນ; ໂຄສະນາ ຂົນຂວາຍແຫຼ່ງທຶນ; ສ້າງສະມາຊິກ ແລະ ອາສາສະໝັກກາແດງ; ສືບທາວຫາຍາດພີ່ນ້ອງ ແລະ ພົວພັນ,ຮ່ວມມືສາກົນ.
ອົງການກາແດງແຫ່ງຊາດລາວ ມີເຄື່ອງໝາຍທີ່ເປັນເອກະລັກສະເພາະ ທີ່ມີປະຫວັດສາດອັນຍາວນານ. ແມ່ນກາກະບາດສີແດງ ເທິງພື້ນສີຂາວ ເປັນສັນຍາລັກ ສະເພາະການເຄື່ອນວຽກງານມະນຸດສະທຳຂອງອົງການກາແດງແຫ່ງຊາດລາວເທົ່ານັ້ນ.
ອົງການກາແດງແຫ່ງຊາດລາວໄດ້ເຮັດໜ້າທີ່ຊ່ວຍເຫຼືອຂັ້ນພຶ້ນຖານໃຫ້ປະຊາຊົນບັນດາເຜົ່າດ້ອຍໂອກາດ ແລະ ຜູ້ປະສົບໄພ ເຊັ່ນ: ນ້ຳຖ້ວມ, ໄຟໄໝ້, ອຸບັດເຫດທາງຖະໜົນ...; ສ້າງຄວາມເຂັ້ມແຂງເພື່ອຫຼຸດຜ່ອນຄວາມສ່ຽງໄພພິບັດ, ປ້ອງກັນສຸຂະພາບ, ສະໜອງເລືອດໃຫ້ຄົນເຈັບຕາມໂຮງໝໍ, ນ້ຳລິນ-ວິດຖ່າຍ, ສະບຽງອາຫານ ໂດຍໄດ້ຮັບການຊ່ວຍເຫຼືອຈາກພາຍໃນ ແລະ ຕ່າງປະເທດ.
